中環出更：王國興食字鬧爆選舉處
選舉事務處去年七月以郵遞方式向八萬二千名選民發出查詢信，要求選民確認及更新登記地址，但當中約四萬七千人無在限期前回覆，因而被取消選民資格，無法在去年底區議會選舉及之前立法會新界東補選中投票。唔單止咁，如果佢哋唔喺限期前重新登記做選民，連九月立法會換屆選舉都無得投票。雖然話呢幾萬名選民無法分辨屬於邊個陣營，但工聯會就一票都不能少，尋日拉隊到政府總部抗議。
處事草率 「愚」弄市民
工聯會立法會議員王國興、郭偉強及麥美娟尋日朝早就到政府總部抗議，強烈譴責選舉事務處做事草率，無視選民履行公民權利。王國興話，被取消資格嘅四萬七千名選民中，約有四萬二千人居住公屋，流動性較低，選舉事務處只靠郵遞方式查詢，做法愚蠢，更係愚弄市民，應該以電話作覆核。郭偉強都話，選舉事務處應善用現有資源核實選民登記資料，因不少選民並無意識主動回覆查詢信。
示威人士最後向政制及內地事務局代表遞交請願信，而王國興並贈送一個巨型「愚」字，藉愚人節玩食字鬧爆當局及選舉事務處愚蠢，希望政府唔好再讓蠢事發生，必須慎重處理選民嘅投票權利。
卓妮