中環出更：東華新人事 搞搞新花款
踏入四月又係慈善團體換屆嘅時候，尋日東華三院舉行乙未年及丙申年董事局交代就職典禮暨晚宴，今年新主席馬陳家歡（Katherine）接替何超蕸成為新一任東華三院大當家。見一班董事局男成員個個都戴住條新領呔及煲呔，上面嘅花紋仲非常特別，原來係東華三院旗下i-dArt培訓院友所設計，Katherine話非常欣賞，於是就決定買咗該花紋嘅設計版權並採用，搞搞新意思，希望令學員有成就感，一舉兩得。
就職晚宴前，東華三院仲安排部分殘障學員於會場即席繪畫創作，又擺放了不少學員的畫作供欣賞及籌款。
馬陳家歡接任「大當家」
其中卓妮發現一張繪畫作品中的人像似曾相識，望清楚發現與東華三院顧問周振基竟然有幾分相似，連周振基自己見到都忍唔住會心一笑，仲與該作品嘅藝術家麥惠鴻一同合照。不過其實麥惠鴻係畫緊自畫像，唔知係咪見過周振基之後希望將來都可以咁有成就呢？
今年東華三院董事局多咗幾個新面孔，其中總理韋浩文及譚鎮國好似好老友，原來兩人幾年前都不約而同加入過東華三院做總理，仲喺當時認識咗Katherine，所以異口同聲話今年Katherine擔大旗一定要翻兜返嚟做總理支持對方喎。同場仲有副主席李鋈麟、王賢誌、陳祖恒、蔡榮星及文穎怡等。
講到今年工作重點，Katherine話會主力做多啲青少年工作，包括與阿仙奴足球學校合作教小學生踢波及前往日本比賽。
卓妮