CY 收逾百萬個fb「嬲嬲」
特首梁振英（CY）同女兒梁齊昕最近「同病相憐」，遇到不如意事情發生。社交網站facebook（fb）於上月廿六日開始，新增包括「嬲嬲」（Angry）等五個表情符號，綜合CY個人fb內嘅留言貼，截至尋日已獲得逾一百萬個「嬲嬲」，單是其fb頭像已獲得逾十九萬個「嬲嬲」，其他留言貼嘅「嬲嬲」數目似乎仍有上升趨勢，唔知道正身處內地出席論壇嘅CY有咩感受？
齊昕暈倒 右眼上方縫針
另一邊廂，身在美國嘅梁齊昕於Instagram帳戶上載最新照片，顯示其右眼上方受傷要縫上多針，佢留言話自己突然暈倒，清醒時已在當地一間醫院，而且「斷片」失去事發時嘅記憶，並留下主題標籤（hashtag），指正等待傷口嘅疤痕痊愈，多名網友其後留言均祝願齊昕保重身體，又提醒要戒口，唔好進食雞蛋、蝦蟹等食物。