政情：鄧家彪好恨亮相亞視
立法會議員鄧家彪（Bill）最近為亞洲電視員工追討欠薪而頻頻出鏡，亞視四月「閂大掣」在即，Bill自爆話，從未試過喺亞視節目亮相，希望亞視熄機之前，可以同亞視新投資者司榮彬喺螢光幕前真情對話，了解吓司榮彬點解堅持希望「亞視永恒」咁話。至於會唔會考慮做埋最後一屆亞洲小姐嘅評判，已經有家室嘅Bill就耍手擰頭喇！
倡加重欠薪僱主罰則
Bill及立法會議員郭偉強、工聯會早前以問卷訪問七百多名市民，選出去年十大勞工新聞，結果亞視欠薪風波成為榜首，其次係退休保障諮詢及強積金對沖，同埋女僱主虐打Erwiana罪成。
勞工議題之中，最多人關心勞工假議題，欠薪、退保及最低工資則緊隨其後。佢哋建議當局簡化申請破欠基金程序、加重欠薪僱主罰則，及盡快統一勞工假同公眾假為十七日等。