政情：鍾偉強求情 fb冇嬲嬲
自從Facebook（fb）新增「嬲嬲」功能後，政界中人要面對真正嘅民意，隨時鬧出國際笑話，估唔到呢個時勢，創新及科技局仍打算開fb，認真勇氣可嘉。創科局副局長鍾偉強（David）尋日到立法會資訊科技及廣播事務委員會開會，首次見傳媒就透露局方開fb嘅想法，仲話「希望唔好嬲我啦！」
David為官都夠運，一上任就遇到局長楊偉雄上京，要即時做署任局長，雖然當日好忙，但亦平安度過，佢笑指，自己得年幾任期，早啲做好過遲啲做啦！仲話咁都幾好，咁快就經歷咗好多人要數個月才有機會嘅經歷。至於下屆仲會唔會留低，就叫大家遲啲先問佢喇！
睇番David喺會上嘅表現，除咗開場發言，只有兩次回答議員問題，但會後就強調自己「好熟書」。至於上任個多月的政助梁淑寶（Sandra）亦有陪同David到立法會，佢話未來會專責社交媒體及與議員聯絡。