中環出更：黎智英密晤「泛民律師團」
壹傳媒集團前主席黎智英（肥佬黎）尋晚又再攪局，除咗「常客」、外號「李漢奸」嘅民主黨創黨主席李柱銘外，同場出現仲有兩名「稀客」，即公民黨主席余若薇及創黨成員張健利，三人共通點均係資深大律師，其中李漢奸及張健利更於執業大律師名冊排名首兩位，莫非官司纏身嘅肥佬黎自知隨時「落鑊」，因此要提早搵人「教路」？
尋日全日不時下雨，但仍無阻肥佬黎繼續於何文田寓所攪局。尋日晚上約六時半，李漢奸及太太乘私家車抵達肥佬黎寓所，余若薇同丈夫緊隨其後抵達，現場所見，余若薇疑帶同一支酒到場。而不消片刻，肥佬黎司機接載張健利到達黎宅，肥佬黎更罕有地步出寓所門口迎接眾人。
今年第六次密會
肥佬黎等人密會歷時約三小時，眾人於晚上九時四十分陸續離開，肥佬黎再次露面送客，肥佬黎司機再次接載張健利及另一名女子離開，李漢奸、余若薇則一如早前一樣，分兩部私家車自行離開。
資料顯示，肥佬黎今年最少第六次密會攪局，而今次更係最多法律界人士出席嘅一次，莫非受到前年佔領行動及政治捐款醜聞纏身嘅肥佬黎，想搵人「教路」諗定後路？
卓妮