政情：公民講場：「TSA受歡迎」 吳得掂自High

全港性系統評估（TSA）引發操練文化備受爭議，考試及評核局早前發信邀請約五十間小學今年試考修訂版小三TSA，又鼓勵學校以自願形式參與試行計劃，有小學事先張揚會透過公投方式表達意見，換言之分分鐘拉倒唔參加試行計劃，不過，教育局局長吳克儉（吳得掂）未有吸取早前嘅教訓，竟然繼續自我感覺良好，話當局已收到唔少小學報名參與TSA，冇聽聞有學校拒絕接受邀請。如果TSA咁受歡迎，就唔會有家長發起罷考，唔知吳得掂係咪外訪得太多，「堅離地」到不知不覺嘅地步呢？