程彤顏 純情魔女

每日辛勞工作下積累落嚟嘅壓力同辛酸,唔少人都會選擇去旅行輕一輕,既可減壓又可為自己充電,好似程彤顏最愛到泰國旅行叉電,從而保持最佳狀態迎接工作,難怪阿妹咁Fit啦!

集資拍寫真

今年23歲嚟自重慶嘅嫩模程彤顏,英文名Gin,出道未夠一年,憑住火辣身材及清純氣質,成功吸引大家注意。原來喺佢出道之初,經理人建議佢走狂野魔女路線,好彩佢最後冇選擇行呢條路,因為正正係阿妹呢種天使氣質加上魔鬼身材,令男士們冧到暈,而佢喺寫真中,更會毫不吝嗇展露胴體曲線美,難怪深得粉絲支持,甚至有忠實粉絲出錢贊助佢拍攝寫真添!

話說上年12月,佢要搵贊助推出新一輯寫真集,起初佢都擔心未能成事,因此喺微博中呼籲真心嘅粉絲幫忙,結果出乎意料,喺短短嘅時間內就已經籌集到足夠嘅資金,對於一位新人嚟講,獲得咁好嘅反應絕對係成功嘅第一步。至於未來嘅發展,佢同其他模特兒一樣,會進軍廣告界及參與商業活動,同時亦會朝向電影界發展,相信以佢咁出眾嘅條件,好快會獲得賞識拍電影。

欠缺自信

唔少人放假嘅時候都鍾意去外國旅遊,而泰國正係好多人嘅首選勝地,原來阿妹亦愛到呢個地方度假,佢除咗喜歡當地嘅文化同美食外,據講每次去到泰國都會令佢更加相信因果報應,做人要多行善積福。先唔講佢點解會有呢種感悟,最重要係可以睇得出,呢位純情美女心地善良,難怪如此討人喜愛。此外,阿妹到泰國梗係唔少得去游水,佢更會自拍性感泳衣靚相,上載到微博同一眾粉絲分享旅遊嘅歡樂,順道讓大家欣賞佢迷人嘅身段。阿妹又表示,現時處於事業拚搏期,去旅行放鬆一下兼為自己充電,以應付繁重嘅工作。

有睇過阿妹微博嘅話,都會發現佢經常流露出缺乏自信嘅表現,其實以佢嘅條件,真係唔明佢點解會咁冇自信心,須知道作為一位專業模特兒,必定要自信心十足,故此希望佢努力建立自信。

題外話,喺佢分享嘅生活照中發現,原來佢有個比佢生得高大,兼同樣迷人嘅細妹,唔知佢有冇興趣投身模特兒工作呢?

個人微博

簡介:程彤顏純情嘅氣質加上前凸後趷嘅火辣身材,單憑外形足以贏得女神嘅稱號,加上佢嗲功一流,令人冧到暈。如果想了解佢多啲,記得去佢嘅個人微博睇吓喇!

網址:www.weibo.com/ann122?is_hot=1

程彤顏Profile

出生地:重慶

身 高:163cm

三 圍:34、23、33

撰文:魂