老子說：「知足不辱，知止不殆。」此乃千古不易之慧語，都說：人為財死，鳥為食亡；其實，更多是「人為權亡」，大多數人就係衰貪得無厭，一旦貪到以為呼吸般正常，就會搞到滿臉豆花，更叫人看出其人格嘅低劣！
真係有辦你睇㗎！被裁定意圖妨礙司法公正罪成判囚十八個月的前全國政協委員劉夢熊就係最佳例子。講真，一個人活到「六十而耳順」，就嚟七十，本該知足「而從心所欲，不踰矩」，可惜人稱「夢熊大師」嘅劉夢熊就係權迷心竅，終於搞到衰收尾。
身嬌肉貴嘅夢熊大師，一朝淪為囚徒，未入獄前之「向天笑」，踎咗兩日，已然頭暈氣虛，要戴住氧氣罩，身鎖鐵鏈被推去伊利沙伯羈留病房，向天笑不成，「個心唔舒服」，鬼咩！「錢是王八蛋，花了咱再賺」，錢冇咗可以再賺。之不過，夢熊大師扮不成先烈，人哋譚嗣同慷慨赴死就義，留下絕命辭：「有心殺賊，無力回天，死得其所，快哉快哉！」而夢熊大師變「灰熊尖啤」，由「愛國人士」變激進反對派人士，更與反中亂港嘅壹淫媒眉來眼去，今後若再扮先烈俠士，恐怕比詹瑞文扮師奶叫夏蕙ＢＢ着三點式泳衣選美更搞笑！「落一片白茫茫大地真乾淨」；對尖啤，只能是粘糕掉到灰堆裏——吹又吹不得，拍又拍不得，苦也！
踎了兩日已頂唔順嘅尖啤，有論者話佢氣短成咁，係中醫「驚則氣亂」嘅說法，依老朽看，係「權力戴陽症」得到解決。中醫嘅戴陽症，簡言之，就係金槍不倒，一柱擎天；呢味嘢本來係男人夢寐以求嘅事，之不過，陰盛陽虛，則陽愈浮於外，金槍就更不倒，精射不出，男人之苦也，所以必須讓其軟了，一軟，就可高呼：倒了！倒了！倒了此時就是一種幸福，夢熊大師由極度亢奮到氣短倒了，才短短兩日，其實也是一種修到！