深水埗區議會的建制派及泛民主派議員數目勢均力敵，選舉委員會正副主席時已經「立法會化」，有泛民議員「拉布」，搞到晚上約十點才完會。不過，原來泛民「有頭威、冇尾陣」，拉布拉到第三次已經收工，皆因發現太多建制派區議員做全職議員，開會開到幾夜都得，可以同泛民議員鬥磨爛蓆，所以拉布呢招喺區議會作用不大，只會消耗體力。
有地區消息透露，民協譚國僑及梁有方等泛民區議員，第一次拉布之後，在之後大會繼續透過不斷長時間發言，同提出無乜特別意思嘅臨時動議拉布，搞到個會開到八點幾九點鐘才完會。
消息又話，泛民拉布期間試過聲稱要拉隊離場，但其實係民協當晚搞咗個蛇宴要去，認真離譜！不過，之後多次會議，亦未見有人拉布，全因泛民根本唔夠玩！
建制派區議員大部分都係全職議員，開會要坐定定喺度，完全冇問題，加上深水埗區比較細，唔夠人開會時，一個電話隨時現身，根本就唔會出現拉布拉到流會嘅情況。
其實，不少立法會議員身兼數職，分身不暇才導致流會，區議員情況完全唔同，呢班泛民未睇清形勢，就竟然東施效顰，認真可笑。