中環出更：星爺上京 揀飲食清腸胃
部分立法會議員尋日起行上北京開會，金融界立法會議員吳亮星（星爺）尋日中午開完立法會大會後亦匆匆起行，仲話上到京食嘢會「簡單為主」，唔通因為內地近年大力打貪同限制宴會開支，所以唔敢大魚大肉？星爺就話，主要因為平時喺香港食嘢食得太多，外出應酬食飯啲嘢又太肥膩，希望趁機會食清啲，當清腸胃喎。
馬逢國隨身紙巾帶陳皮
體育、演藝、文化及出版界議員馬逢國就話，版權修訂條例草案過唔到，覺得好失望，所以「離開吓都好」，可以「暫時開脫」。問到會否喺北京周圍行吓，同食好嘢散心，佢就話咳到就嚟死，仲要帶定藥上京，好彩有朋友送咗「好嘢」畀佢。「好嘢」係乜呢？佢就立即喺衫袋拎咗一團紙巾出嚟，打開原來係陳皮。陳皮的確有化痰止咳功效，但咁樣包裝似乎唔多衞生囉。
工聯會議員陳婉嫻就話，北京天氣比香港凍，除咗帶備羽絨外套外，潤膚露先係最重要，因為南方人始終唔習慣北方嘅乾燥天氣，況且嗰度唔會有湯水飲，最多都係得啲蛋花湯，所以佢會飲蜜糖水滋潤吓，亦禁止自己食辣嘢喎。
卓妮