中環出更：「惠」眼識女服 源遠流「長」
長衫大家見得多，但點先為之着得靚？「長衫」同「旗袍」又有乜分別？金紫荊女企業家協會（協會）日前就邀請長衫薈顧問兼香港歷史博物館特約研究員李惠玲於活動上講解。李惠玲話，七十年代前，廣東地區的「長衫」通常指男女裝中式長袍，由來已久，「Cheongsam」一詞更收錄於《牛津英語字典》專指女性長衫。而「旗袍」則是七十年代後香港才普遍使用，專指二十年代以後上海流行的女性袍服。
對於有人指「旗袍」係旗人嘅袍或國服，李惠玲就話至今仍未有定案，但睇番一九二九年《服飾條例》中規定女子禮服的「衣」，基本與男子禮服相同，並無提及過「旗袍」之名。而長衫愈長開衩就愈高，方便行走，但要留意坐姿儀態；衣長度較短的開衩則較細，至於領口方面愈高挺及貼近頸項愈見端莊。佢仲笑言，好多中式食肆服務員的制服選用織錦布料長衫，唔想同服務員「撞衫」可以揀其他布料。
卓妮喺活動上見到身穿蝴蝶花紋長衫嘅協會主席彭芷君瘦咗成個碼，原來佢近八個月積極減肥，唔食飯類，每晚六點鐘後唔再進食，再加一星期最少兩次運動，成功減咗二十磅咁多，下咁多苦功，難怪連外套個衫袖都「有位出租」，抵佢着起件長衫咁好睇。
改良長衫可變時尚
同場仲有常務副主席丘璟珊、林淑怡、副主席李凱琪、成員蔡毅明及沈貝嘉等。專門設計長衫的蔡毅明話，用料及細節位都係令長衫變時尚的關鍵，而沈貝嘉與李凱琪則在上海買到心頭好長衫，可以返工同出席活動兩用，沈貝嘉就帶埋引入歐美Blow Dry Bar到港的好友張璐妍出席，介紹長衫與髮型配搭。
卓妮