探射燈：老香港街失色
近七十年歷史的旺角花墟近日傳出搬遷消息，再次令人慨嘆老香港情懷逐漸消失，今時今日的香港，不少「特色街」已經物是人非。過去本港有不少特色街道，例如中環「花布街」、旺角「雀仔街」、灣仔「喜帖街」，惟經過重建搬遷，無一不磨滅殆盡。本報記者近日走訪上述各街新址，發現「新花布街」面臨再搬遷；「新雀仔街」鮮見雀友，只餘遊客；「新喜帖街」更已成高檔名店區。時代巨輪會否輾碎花墟？且讓我們拭目以待。
喜帖街面目全非 名店進駐
灣仔利東街過去有大量婚嫁店雲集，當中更不乏喜帖印刷公司，故又名「喜帖街」。它不僅是港人的集體回憶，過去更是連旅遊發展局都會推薦的旅遊景點之一。惟在經歷十二年的重建工程，圍板去年拆封後，重現眼前的利東街已經面目全非。
過去的喜帖街現由豪華商場進駐，舊唐樓幾乎一掃而空，換來的是新建豪宅。一直希望能夠保育利東街的老街坊May姐直指，當局保育的想像與現實，完全是兩回事，「一開始就話要保育利東街，圍封嘅木板上面仲有婚嫁兩個字，叫做有啲關係，之後就改名叫囍歡里，最後就乜都冇，依家就話要做一級商場。」
無特色 舊店拒落戶
由小店滿街變為名店林立，利東街的身價可謂「三級跳」，租金上升亦在意料之中，在喜帖街經營樓梯檔的May姐謂，當局有意安排二十多檔喜帖街舊店重新落戶，最後僅有不足十檔答應，「唔搵我可能係睇我唔起，但係點解咁多人（舊街坊）唔返去？大家可以諗吓原因。」
May姐最懷念的，是過去鄰舍守望相助的氣氛，「依家乜嘢社區特色都冇晒，啲街坊都話，一走咗就乜都打散晒。」她把矛頭直指市建局，在保育方面乏善可陳，把喜帖街徹底變天。
花布街屈身商場 恐再迫遷
在俗稱「花布街」的中環永安街布商，受市區重建影響，於九十年代初獲安排在上環法定古蹟西港城一樓繼續經營。時至今日，西港城已再無昔日的花布街風采，布料齊全依舊，布商卻門可羅雀，相反地下及二樓的食肆更受市民歡迎。
由中環搬到上環的利來呢絨行老闆陳伯憶述，在永安街時的舊舖樓高四層，當時主要做批發，每年生意百萬元上落，以優惠租金落戶西港城後經營零售生意，「我都唔擅長（零售）嘅，依家每年都蝕十萬八萬。」即使如此，他仍繼續開舖，「當興趣啦，唔想停落嚟，有行家唔做一、兩年就唔喺度（死去）。」
布商唏噓：慢慢淘汰
重置當日，當局有意保留花布街的傳統特色，可惜事與願違，昔日景象不復見，陳伯無奈指，「嗰陣成條街都係同一行業嘅舖頭，氣氛唔同啲，依家呢度人流少咗，冷清好多。」那些年製衣業在本港吃香，現在行業式微，陳伯唏噓表示，「冇辦法啦，惟有慢慢畀人淘汰。」
一九○六年落成的西港城，未來將會迎來一場大維修，「新花布街」隨時要再度搬遷，陳伯表示目前仍未有人到場為他們講解詳情，去向如何尚未分曉，不過曾經搬遷的他坦言，「最好唔好再搬啦，我驚到時一個客都冇。」
雀仔街寂靜 檔販淪布景
「雀仔街」原本是指旺角康樂街，坐落在旺角核心，在九十年代「亞皆老街／海街重建計劃」之後，與附近區域一同搖身一變成為朗豪坊。「新雀仔街」則遷往旺角園圃街，是當局為了保留雀仔街的特色和風貌，而興建的雀鳥花園。當中預留了七十個雀鳥檔位，供雀仔街販商繼續經營。
鮮見雀友 遊客為主
財記陳伯由舊街搬到花園，見證了雀仔街的轉變。「原址條街短短哋，好多間舖頭，啲人慕名而來又有，真心玩雀又有，生意好好！」他坦言，搬離旺角中心地帶之後，新雀仔街不再「就腳」，「真係玩雀嘅人成日拎住個鳥籠，好難搭車，佢哋都少咗嚟，唔搬好過搬。」
重置雀仔街，當局亦有衞生方面的考量，陳伯則表示，「搬咗之後的確衞生好咗，不過其他嘢差咗。」新雀仔街空有其名，卻沒有太多雀友聚集，「依家主要多遊客嚟影相，好少會幫襯，我哋咪做吓布景板囉，搬過嚟之後有十幾檔都做唔住執笠。」
記者採訪當日觀察了約半小時，到雀鳥花園的遊客較多，已經被「景點化」，僅得約半數店舖開門。生意方面，陳伯坦言，「生意係其次，主要係有個地方畀大家開檔，應該都係蝕住做。」
圖/文：專案組