民政事務局局長劉江華啱啱結束約十日休假，尋日復工出席多個農曆新年團拜活動。佢一現身就被發現右邊臉頰疑似有兩條「紅印」，而且出席活動期間似乎心事重重，惹人聯想。當問及右邊臉頰「紅印」嘅由來，佢就話，「哈哈，係最新嘅化妝」，然後就急急離開。究竟劉江華臉頰「紅印」嘅真相，係尋日朝早剃鬚時整親、畀蚊咬吖，抑或係同前日初七「人日」兼情人節，因事冇同太太慶祝或送禮物有關連，相信只有劉江華本人至知道嘞！
