政情：公民講場：肥亨「剪布」 爽快過建制

港鐵公司尋日召開特別股東大會，表決以借貸方式派發特別股息以支付高鐵超支嘅議案，多名反對高鐵工程嘅泛民人士，包括社民連議員梁國雄同公民黨議員郭家麒等，分別喺場外示威同場內發言抗議，當正個股東會係立法會咁。不過，港鐵主席馬時亨（肥亨）一到場，就喺場外同梁國雄鬥搶咪，場內又同郭家麒公開駁火。最後個會開咗兩粒幾鐘就搞掂，議案喺99.8%贊成下通過，「剪布」手法乾淨利落過建制派好多。