政情：公文袋 新同盟 超選爭插旗
立法會俗稱超級區議會議席嘅五席區議會第二界別議席，泛民主派正為力保三席爭崩頭，事關兩名現任超級議員民主黨（白鴿黨）何俊仁及民協馮檢基，於區議會選舉落敗失去超級議席入場券，多個泛民黨派對此蠢蠢欲動，政圈消息指一○年反對超級議席功能界別嘅公民黨（公文袋）同新民主同盟（新同盟），雙雙反口想選超級議席，睇嚟議席利益當前，即使係泛民同路人都冇面畀，誓要把該議席爭到手！
公文袋冇知名區議員
泛民一二年於超級議席合共取得三席，今年九月首要目標都係以保住三席為目標，其中公文袋黨魁梁家傑早前放風，建議泛民兵分三路爭超級三席，第一路係白鴿黨、第二路係民協、街工及工黨，最後一路係公文袋及新同盟，其中公文袋及新同盟依家都冇超級議席，此舉明顯係想透過出口術提早「插旗」。據知公文袋嘅如意算盤係，估計新同盟未必派人參選，只要向其他泛民借到提名票，到時就有機會於功能界別寸土必爭再多取一席，唯一隱憂係冇具知名度嘅區議員披甲上陣。
不過政治一日都嫌長，據知早前對選超級議席吹淡風嘅新同盟，最近取態產生微妙嘅變化，其唯一立法會議員范國威近日向泛民議員摸底，查詢大家點睇參選超級議席，呢個正正同新同盟一向對外話，會考慮借票畀其他泛民嘅說法不同。
新同盟或致老巢失守
事實上，新同盟嘅微妙變化建基於擁有十五名區議員，剛好取得參選超級議席所須嘅入場券，外界認為擁有一定知名度嘅范國威，代表新同盟出選超級議席嘅可能性最大，而且最有勝算，從而騰出佢原本嘅新界東直選議席，畀其他兄弟上位。
然而，新同盟如要出戰超級議席要解決兩個問題，一是如何自圓其說，特別係范國威於六年前反對超級議席而退出白鴿黨，另起爐灶成立新同盟，到可能親自披甲上陣嘅突變，二是如何避免四年前嘅翻版情節上演，所指嘅新同盟會否重蹈覆轍，一如當年民協「一來一回」，具有知名度嘅候選人轉戰並當選超級議席，惟老巢卻失守。究竟公文袋同新同盟爭崩頭想選超級議席，哪一方可以笑到最後，政治惡鬥在所難免。