中環出更：本土派參選新東 五方大亂鬥
立法會新界東補選將於下月廿八日舉行，繼民建聯周浩鼎、公民黨楊岳橋同獨立嘅西貢區議員方國珊先後正式報名參選，主打勇武本土路線嘅「本土民主前線」梁天琦同主打第三路線嘅「新思維」黃成智，尋日亦分別舉行參選記者會同誓師大會，令補選由原來嘅泛民建制兩陣對決，演變成一場五方混戰同互相「鎅票」之爭。
有政界中人分析，新東向來喺泛民嘅最強選區，得票率從未低過五成半，楊岳橋雖然面對中間派同本土派左右夾擊，但兩名候選人都唔算重量級，估計只會合共「鎅」到佢一成至一成半票，即楊岳橋點計都仲有約四成得票。
周浩鼎「受鎅」情況嚴峻
反觀周浩鼎面對嘅疑似「鎅票」對手方國珊就強得多，再加上同民建聯有積怨嘅鄉議局，至今未肯表態支持佢參選，就算將來表咗態亦可能陽奉陰違，轉投畀同鄉事派關係唔錯嘅方國珊。只要周浩鼎流失超過半成選票，得票比率就會低過楊岳橋。不過選舉依家只係啱啱開始，仲有好多變數嘅！
卓妮