中環出更:校舍擴充 「明」德育英才

依家唔少小朋友參加形形式式興趣班,猶如十八般武藝「能文能武」,然而小朋友待人處世態度都唔可以忽略,港鐵主席馬時亨大女馬露明(Christine)早幾年就察覺呢方面嘅需求,創立名為JEMS嘅德育學校,尋日該校為擴張樓層舉辦開幕典禮,期間馬時亨透露小時候事迹,就係媽媽唔鍾意佢成日「先斬後奏」踢波,而教育局前政治助理楊哲安則以獎貼紙形式教導小朋友付出才有收穫嘅概念。

尋日一大班政商名人均撐場支持該校擴張樓層儀式,包括食物及衞生局副局長陳肇始、港大醫學院院長梁卓偉及港大校委楊紫芝、教育統籌委員會前主席鄭慕智、廖創興家族新抱周瑋瑩等。

馬時亨妻身教孝順之道

講起以前教小朋友同依家嘅分別,馬時亨話細個時父母好着重讀書成績,唔重視課外活動,又自爆係「食藤條炆豬肉大」,最記得媽媽唔鍾意佢成日掛住踢波,因此佢通常「先斬後奏」,踢完返屋企後例牌畀阿媽鬧,之不過兩母子冇隔夜仇,打完鬧完阿媽又會呵番;馬時亨太太馬王培琪則話,兩個女可能見自己好錫同好照顧一齊住嘅奶奶,所以有樣學樣,一樣咁錫佢哋兩夫婦。

Christine同老公劉仲恒認為,依家好多父母都忙住返工,而學校又忙住教課本嘅知識,加上現時互聯網資訊發達,因此品德同價值觀教育變得更重要,要確保小朋友將學到嘅知識,並將之向好嘅方面發揮善用。

楊哲安及太太楊張新悅則另有一套教小朋友方法。楊哲安話,現今小朋友對「珍惜」同「分享」嘅概念較弱,自己同太太平日會以「獎貼紙」形式教細路,舉例指每幫手做一樣家務有一個貼紙,儲夠幾多張可以換零食,等佢哋知道要付出先有收穫。

卓妮

第一手消息請下載on.cc東網iPhone/iPad/Android/Windows Phone Apps