政情：李鎮強未參選先面試
正考慮參加立法會新界東補選嘅自由黨東區區議員李鎮強（Michael），未決定出戰就先過面試難關，不過面試嘅係佢三歲嘅囡囡，原來Michael要陪囡囡考幼稚園，難題仲一個接一個添！話說第一間面試嘅幼稚園，除咗考記性，仲要考指力，要求佢囡囡用大衣夾夾住粗筆，小朋友確實唔夠力，Michael都相信會考唔到。
到第二間幼稚園就考起Michael夫婦，無論攞表定面試，如果唔係父母一齊帶小朋友去就會扣分，Michael太太因為請唔到假，搞到囡囡入咗候補名單，最近幼稚園邀請佢哋去聖誕舞會，佢太太先請到假，仲帶埋囝囝一家四口到齊，希望加番分。
憂補選影響子女學業
不過，Michael慨嘆話，請咁多次假都有畀老闆話佢，大嘆依家啲面試冇考慮雙職家庭嘅難處，又擔心若參加新界東補選，可能會影響小朋友面試，就好似佢早前專心區議會選舉，都影響囝囝考小學咁，希望小朋友會明白佢啦！