政情：前藝員黃澤鋒加盟新思維
主打「第三路線」嘅新政黨「新思維」尋日正式成立，舉行首次會員大會選出領導層，其中黨主席為前民主黨立法會議員狄志遠（Dick）、副主席有前新民黨副主席鄭承隆以及姜炳耀同廖添誠，秘書長為年僅廿四歲嘅前理大學生會會長兼前公民黨成員黃俊瑯，普通黨員方面仲有一位前無綫及港視藝員黃澤鋒。
黃澤鋒表示，與新思維副主席姜炳耀於兩、三年前認識，對方其後游說佢入黨，佢自覺認同新思維嘅中間路線，於是決定加盟，並會喺本周四嘅新思維成立晚宴上任司儀，但未有拉攏其他演藝界朋友。姜炳耀透露現時仲同幾名現職藝員傾緊入黨，成事後會公布。
學生領袖十居其九都係激進派，但黃俊瑯經過多番轉折後，最終都係認為新思維嘅中間路線啱自己多啲。佢曾經幫過自己喺理大嘅老師、工黨立法會議員張超雄助選，去年更短暫入公民黨，但最後認為該黨路線同自己嘅理念有別，加上阿Dick落力游說，就決定轉會，並且不排除將來代表新黨參選。