政情：港台亂熄咪 論壇爆衝突
港台節目《城市論壇》尋日討論立法會新界東補選及換屆選舉等議題，但多名講者都講到離晒題，包括李國章出任港大校委會主席爭議、銅鑼灣書店接連有股東及員工失蹤事件等。期間保衛香港運動召集人傅振中喺發言中途被「熄咪」，炮轟港台同論壇主持蘇敬恆唔公道，扼殺佢嘅言論自由。
主持一度受衝擊
事緣論壇嘉賓講者民主黨主席劉慧卿，首先提及失蹤事件。傅振中其後喺台下發言，批評卿姐離題，又以本港社運人士楊匡年前喺內地被捕做例子，質疑「你哋啲泛民自己做犯法嘢」才「出事」。蘇敬恆隨即指楊匡被捕與今次失蹤事件冇關係，其後更強行將傅「熄咪」。到節目小休時段，傅衝上台前與蘇理論，多名工作人員一擁而上將雙方分隔，情況一度混亂。但傅喺節目恢復直播前，已自行返回台下，未有影響節目進行。
蘇敬恆事後解釋，覺得傅振中嘅比喻唔恰當，但其後佢又改口稱，係因為傅發言超時先「熄咪」，否認因政治立場而唔畀佢講嘢。