政情：貨櫃當議辦 連任照嗌慘
新一屆區議會合共四百多名區議員上周五正式履新，上屆區議會中後期開設貨櫃議員辦事處嘅元朗區議員陳思靜及東區區議員何毅淦，新一屆區會任期繼續坎坷，其中陳思靜形容租用貨櫃議辦係「走投無路」，最新又因政府會喺佢辦事處所在位置興建升降機，其議辦又面臨「被搬遷」；何毅淦則經歷兩年貨櫃議辦生涯後，有意將貨櫃議辦由「一變二」，將之打通增加議辦面積，似乎二人有晒心理準備，與其望天打卦不如自求多福好過嘞！
要於當區最貼心服務市民，設立議員辦事處看似理所當然，惟部分議員對議辦落腳點都費煞思量，其中於四年前，已循天盛選區當選區議員嘅陳思靜，多次申請租用舖位作辦事處都被拒，其後當區商場旁擺街站一年多，直至二○一三年底開設全港首個貨櫃議辦，但據知其貨櫃議辦並非由廢棄貨櫃改建，而是以鋼鐵支架搭建組合屋。
然而事隔兩年，陳思靜非但於搵固定議辦方面無甚進展，並面臨最新一次大遷徙，據知因應政府嘅「人人暢道通行」計劃，其貨櫃議辦所在位置將興建升降機，佢於Facebook亦預告新任期首項重大工作，就係議辦準備整個搬遷。
唔似返工 六助理辭職
陳思靜憶及貨櫃議辦點滴時嘆道，冇固定辦事處間接造成大量助理流失，曾經試過一年多內六個助理先後辭職，共通原因之一係日日喺條街度都唔似返工。佢續指，貨櫃議辦嘅租金比舖位平，惟單係組合屋每月便花費五千元，加上每季四千元差餉，換言之同租用公屋舖位相若，更要承受打風落雨帶來風險。
百五呎 租金要五千元
再度連任杏花邨選區區議員嘅工聯會何毅淦亦「同病相憐」，佢同樣於一三年底開設貨櫃議員辦事處，據知貨櫃議辦面積僅一百五十呎，租金卻高達五千元，而且不設洗手間。何毅淦透露，該貨櫃議辦由申請、批地至租用需時一年半，而於貨櫃議辦落成後，亦要面對夏天熱、冬天冷嘅問題，如搵到地方搬遷料可改善環境，惟至今似乎未有進展。
何毅淦其後靈機一觸提出新方案，計劃於原有貨櫃議辦增設多一個貨櫃，將之打通以增加議辦面積，之不過有關細節仍有待與政府商討。究竟此舉係有人一廂情願，定係闖出一條新出路，就要嘗試過至知嘞！