中環出更：周浩鼎誓師 鄉議局自由黨冇影
立法會新界東補選明日開始接受提名，民建聯副主席周浩鼎（Holden）尋日正式宣布參選，獲工聯會、新民黨等多個建制政團嘅領導現身撐場，但唯獨不見鄉議局同自由黨嘅代表。民記方面聲稱，鄉議局主席劉業強原先答應出席，但突然有急事先嚟唔到，自由黨方面就因為溝通問題而派唔到人嚟喎。
自由黨主席鍾國斌喺出席《城市論壇》時，踢爆民記喺幾日前先叫佢哋支持Holden，之後又有多日假期，覺得安排有欠周詳。論壇另一講者民記立法會議員鍾樹根就話，建制派大家都係大人喇，正所謂「大人有大量」，唔需要挑撥呢啲瑣碎嘢。須知鄉議局同自由黨喺新東都有唔少票，如果Holden得唔到佢哋支持，呢場選戰真係凍過水。
多方勢力參選爆混戰
西貢區議員方國珊昨早亦搶閘宣布參加新東補選，強調會奉行泛民與建制之外嘅第三路線，即係雙方嘅票源都要搶。再加上同樣主打第三路線嘅新思維、獲泛民支持嘅公民黨楊岳橋、以及盛傳會派人參戰嘅激進本土派，呢場補選實為一場大混戰同「界刂」票戰，絕非過往多場立會補選嘅簡單兩派對決。
卓妮