中環出更：青年工業家 商機優「越」
內地經營工廠嘅成本不斷上升，唔少廠商近年都四出物色有潛質做生產嘅新落腳點，務求減低成本，卓妮早前見到理文造紙首席執行官李文斌，佢話近年唔少公司都選擇於越南設廠，佢哋亦係其中之一，底因係於當地設廠，人工比內地低很多，舉例指內地一個工人月薪約四千元，越南則平均月薪約一千元。
香港工業總會與青年工業家協會早排舉辦傑出工業家及香港青年工業家頒獎禮，講起行業新趨勢，唔少廠商都趁機交換心得，其中一名得獎者、南旋集團首席營運總監王惠榮，原來同李文斌嘅做法類同，將於越南投資廠房，佢話當地除了人工便宜外，稅務政策亦比較吸引其客戶。
不過唔係所有類型嘅廠都適合於當地進行生產，另一名得獎者、潤成紡織總監吳慧君認為，內地工人在造工方面嘅技術，較其他東南亞國家好及有經驗，產量較大之餘，其周邊配套亦較完善，例如佢哋生產嘅運動服裝，在內地廠房附近通常會有齊晒其他不同配件如拉鏈等，相當方便，因此於邊個地方設廠，亦要視乎生產甚麼物品。
彭一邦自幼訓練「落地盤」
同場嘅得獎者仲有俊和發展集團副主席彭一邦、百麗國際控股副總裁兼港澳區總經理鄧穎思、黛麗斯胸圍製造廠董事總經理黃啟智等人，其中彭一邦憶述，自己八歲時就跟爸爸落地盤幫手，仲試過畀啲鐵釘拮親腳，不過當時可能太細個，唔覺得厭惡或者辛苦，反而仲隨時間習慣咗有關工作喎。
卓妮