政情：公民講場：張炳良打尖 陳健波冇符

立法會工務小組委員會早前已經通過港珠澳大橋香港段口岸工程撥款申請，政府其後就會將撥款申請提交財務委員會審批。財委會主席陳健波喺尋日播出嘅一個電台訪問自爆，話政府曾經想將港珠澳大橋撥款申請「繞過」工務小組，直接提交財委會審議。佢話，作為主席當時都有反對，覺得唔合議事規則就唔應該畀政府咁做，強調要堅守呢個原則。事實上，政府如果夾硬要繞過工務小組向財委會提交議程、甚至抽走其他議程，只剩港珠澳大橋一項撥款申請討論，陳健波都係冇符嘅。所以就算運輸及房屋局局長張炳良霸王硬上弓，陳健波就算死撐，相信都有心無力喇！