星爺金句：「做人如果冇夢想，同條鹹魚有咩分別呀？」不過食得鹹魚抵得渴，要追逐夢想嘅話，就一定要忍受得到過程中所遇到嘅種種辛酸同困難。對於內地人氣模特兒岑苑之嚟講，相信有深刻嘅體會，初出道時佢為咗達成夢想，勇於面對各種問題，今日終於成功取得佳績。
呢位24歲嚟自廣西河池，原名岑橙艷，網名Barbie Baby嘅壯族姑娘，外形相當出眾，先唔講佢上圍幾咁有睇頭，單係甜美嘅笑容加上水汪汪嘅大眼睛，已令人有種甜到漏嘅感覺。初出道時以蘿莉形象示人，配合埋一副玲瓏浮凸嘅身材，大受粉絲歡迎，尤其係當佢推出處女寫真集後，人氣更係直線飆升。自此之後，大家經常可以喺時裝、汽車等雜誌見到苑之嘅蹤影，同時佢亦拍攝唔少廣告，成為廣告界嘅寵兒。
大家都認為苑之事業一帆風順，原來背後有段不為人知嘅辛酸。自細夢想加入娛樂圈嘅佢，一直係學校中嘅文娛委員，亦係一位成績優秀嘅優等生，可惜因為家庭經濟關係，故此畢業後並無選擇進入藝術學校就讀，反而隻身到大城市工作。呢個時候佢結識咗一位模特兒，並透過對方介紹開始接觸有關工作。據佢講當時工作得相當辛苦，由於冇經理人關係，佢要一邊顧及現有嘅工作，一邊兼職做模特兒，期間更遇到好多唔公平嘅待遇，亦試過受騙，甚至被鹹濕攝影師毛手毛腳，但係佢仍然冇放棄，反而更加努力，終於取得今日嘅成果。
雖然喺模特界取得亮麗嘅成績，但係苑之仍未感到滿足，因為佢嘅夢想係喺娛樂圈發展。事實上，阿妹並未接受過正規嘅表演及唱歌訓練，只係佢自己不斷練習，然而佢嘅演技唔差，絕不遜於藝術學院嘅畢業生。喺2013年佢參加內地大型古裝電視劇嘅劇組演員選拔賽，結果獲選成為其中一個演員，雖然唔係主角，卻已成功踏出演藝人生嘅重要一步，而透過呢次演出，佢深入了解演員嘅生活、演戲知識同埋劇組嘅運作。由於佢表現出色，之後獲得唔少電影及電視劇嘅演出機會，及後仲簽埋經理人，從此結束一個人奔波嘅日子。
除咗演戲外，苑之亦積極向音樂界發展，喺今年1月，佢憑住甜美嘅歌聲推出第一首個人單曲《女人的天》，另外又喺9月參演MV嘅拍攝工作。阿妹得到咁好嘅成績非僥倖，而係全靠佢多年嚟嘅努力。問到佢喺呢幾年打拚生涯中，令佢感到最可惜係乜嘢事？佢坦言係冇返過家鄉嘅屋企，尤其係每次接到母親自遠方打嚟嘅電話時，嗰種內疚同埋思鄉之情，更係令佢倍感悲傷。不過為咗繼續追尋夢想，佢仍然咬緊牙關向前走。
簡介：苑之嘅外形迷人，大眼加上甜美嘅笑容，足以融化男人心，配合埋玲瓏浮凸嘅身材，更係叫人一見傾心。如果想知道佢更多近況嘅話，就記得去佢嘅個人微博，緊貼呢位蘿莉美人嘅最新動向。
網址：www.weibo.com/u/5087728216
出生地：廣西河池
身高：165cm
三圍：33、24、34
撰文：魂