政情：侯志強務農 嫌塊田太大
都市人生活忙碌，唔少人放假都會歸隱田園，喺新界一啲農莊種吓蔬果植物當減壓。原來上水鄉事委員會主席侯志強都好鍾意落田耕種，因為可以當做運動咁話。佢仲透露自己塊農地大到好似樹林咁，有過百棵植物，要請工人幫手打理，但就因為唔夠人手，搞到部分農地要被迫荒廢喎。
原來侯志強一向都有種開盆景同果樹，當中又以食得嘅蔬果為主，好似木瓜、粟米、香蕉等。佢仲即場展示手上嘅繭，話係落田造成(o架)喎。雖然種嘢種到雙手起繭，但自稱「鄉下仔」嘅侯志強就一啲都唔嫌辛苦，仲話可以當做運動添。！
早前就盛傳侯志強會參加明年二月舉行嘅立法會新界東補選，侯志強就話自己冇意欲參選。不過尋日西貢區議員方國珊就喺社交網站表示有意參選，仲問網友會唔會提名佢添。