立法會工務小組委員會尋日首次開會審議廣深港高鐵香港段鐵路工程約一百九十六億元追加撥款申請，但在泛民主派不斷就議程排序、會議紀錄方式及提出休會動議「拉布」嘅情況下，白白浪費兩小時都未入到正題。特別出席會議接受議員提問嘅運輸及房屋局局長張炳良，除咗開場發言之外，就只能全程呆坐。眼見高鐵深圳福田站下星期就開通，四十幾分鐘就可以由廣州去到福田，唔知張炳良心入面會唔會哀呼︰「真係去福田試搭完新高鐵返港，都未輪到我講嘢！」
