政情：人力建議搬走機場起屋

特首梁振英明年初就會發表新一年度施政報告，人民力量議員陳偉業（大舊）及陳志全（慢必）尋日就此提出多項建議，包括政府向市民派發一萬元，以及要求透過普選形式去產生新一屆特首及立法會議席。不過，今次佢哋有新猷，建議政府搬走香港國際機場及葵涌貨櫃碼頭，用來發展新市鎮及工商業住宅用地，咁咪反轉香港咁滯？

大舊話，機場搬走後，所得土地仲可以改建成容納六十至八十萬人口嘅新市鎮，除咗可以增加土地及房屋供應，認為此舉比起興建機場第三跑道更符合經濟效益。

問佢機場同貨櫃碼頭應該搬去邊，佢就話要等顧問去研究，即係得個講字。其實早前都有研究認為要開發郊野公園，以及拆卸高爾夫球場改作房屋用途，對比起搬遷機場同貨櫃碼頭，相信簡單得多。

不過，貨櫃碼頭及機場係香港運輸同物流業嘅大本營，好難話搬就搬，換言之人民力量嘅建議唔止係不可能任務，簡直就係妙想天開。

如果香港要落實佢哋嘅建議先至搵到土地建屋，相信未起好住宅之前，已經天下大亂。另外，慢必又講到未來嘅抗爭大計，佢話會繼續拉布，但要睇各黨派嘅參與程度，希望有更多泛民議員一齊參與拉布喎。