每年嘅十二月下旬除咗係聖誕佳節，亦係港澳特首上京向國家領導人述職、中央政府總結港澳特區政府過去一年工作嘅日子。消息指出，北京高度讚揚澳門政府同澳門中聯辦過去一年嘅工作，但係就暗踩香港未能貫徹落實「一國兩制」，包括遲遲未就《基本法》第二十三條立法，以及擺唔平高鐵「一地兩檢」爭議等。
消息指出，北京認為澳門在回歸後充分體現「一國兩制」，又成功就廿三條立法，有效保障國家安全；經濟民生方面，橫琴新區發展迅速，澳門當局早前更主動提出在橫琴實施「一地兩檢」，便利兩地人民往來。
反觀香港，消息就指香港至今仍未就廿三條立法，甚至連時間表都唔敢提，視國家安全及《基本法》如無物；廣深港高鐵香港段實施「一地兩檢」，對香港嘅利益大於內地，有關安排在外國亦有大量實踐經驗同例子，但偏偏香港社會就有人質疑「一地兩檢」破壞「一國兩制」，政府藏頭露尾遲遲唔敢提出具體建議，長此下去，香港真係玩完！