中環出更：吳得掂知衰 唔去賞花去開會
教育局局長吳克儉（吳得掂）早前只顧遊日賞紅葉而不理全港性系統評估（TSA）公聽會，為本身已鬧得熱烘烘嘅TSA火上加油。尋日吳得掂又有賞花機會，但今次佢竟然臨時甩底，唔通局長見過鬼怕黑？抑或覺得香港嘅花唔及日本呢？
話說有關活動嘅公關一直以為吳得掂會到場，喺典禮開始前話暫時未能聯絡局長，但相信吳得掂至少會出席典禮後嘅導賞團。點知典禮開始咗，公關先話接觸到局方，告知吳得掂未能出席活動而且原因未明，估計局長「可能撞schedule（行程）」。愛賞花嘅局長突然甩底，唔通有急事？
缺席冇預早通知
教育局發言人證實，局長尋日確係有正經事要辦，就係列席負責檢討TSA嘅委員會會議。吳得掂明明唔係委員會成員，但竟然放棄賞花機會去開會，唔理背後原因係乜，今次佢肯以正經事行先都係正確嘅決定，但喺安排上就明顯有改善空間，如果早啲通知主辦單位唔到，相信整件事會好睇得多喇。
卓妮