中環出更：向名廚偷師 卿姐「破地獄」
立法會議員經常要開會，又飽受「拉布」影響，要親自下廚都唔容易。議員劉慧卿（卿姐）同麥美娟（Alice）尋日就參加工展會舉行嘅「名廚齊惜福」活動，同兩位名廚周中、何志強齊齊將剩食化腐朽為神奇，推廣減少廚餘訊息。Alice自嘲連煮即食麵都可以煲燶，但負責煎豬扒嘅卿姐揼豬扒時就展現出純熟嘅廚藝，就連大會司儀都忍唔住話，卿姐真係揼人定揼豬扒都咁叻呀！
卿姐夥拍何志強合作用湯渣煎有機豬扒及脆米菜粒炒飯，雖然卿姐自稱冇乜下廚，但見佢用刀揼鬆啲豬扒時有板有眼，連司儀都講笑話卿姐揼人同揼豬扒都咁叻。卿姐即刻反駁話︰「唔好亂講啦，咩揼人呀！」同卿姐相識多年嘅周中亦都大讚話，卿姐唔淨只喺立法會先咁叻「口架」。卿姐就自爆以前都係「地獄廚神」，都係參加烹飪活動多，而且活動上多數有周中睇實，先至進步神速喎。
大廚唔識用電磁爐
至於Alice就夥拍周中炮製炒蝦仁及用菠菜莖炒蛋，Alice似乎就真係冇乜點下廚喇，事關周中饌油落鑊時，佢就即刻彈開三呎，話驚畀油彈親喎。之後佢又炒燶菠菜莖，而「發」蛋同落鹽亦要事事問過周中，難怪佢話自覺係「搗蛋」叻啲喇。不過，兩位大廚對住大會嘅電磁煮食爐似乎都有啲頭痕，唔係唔識開爐，就係唔識調校火力，要贊助廚具嘅德國寶董事長陳國民（Edward）幫手。
Edward最近就去完日本同柬埔寨返港，雖然日圓貶值吸引唔少人遊日「血拚」，但Edward就反而冇乜點掃貨，主要都係去食好嘢。佢又話，今年工展會人流同大家嘅消費意欲都弱咗，可能係因為大家都對經濟前景唔樂觀喎。
卓妮