立法會新界東補選引發各黨爭奪戰，但隨着公民黨公布派出大律師楊岳橋（Alvin）參選，傘後組織青年新政緊接表態唔派人出戰「鎅票」，補選選情睇落開始明朗化，會由Alvin迎戰民建聯副主席周浩鼎（Holden），但據知激進泛民、建制、以至走中間路線嘅各路人士都密謀藉今次補選提高知名度，為明年立法會選舉熱身，呢場補選睇怕同明年大選一樣七國咁亂。
泛民主派方面，據悉主打本土議題嘅本土民主前線發言人黃台仰、由黃成智及狄志遠牽頭成立嘅新思維都有意參選，兩方喺泛民光譜上各走極端，同公民黨亦不咬弦，相信大家勢必互相鎅票。
至於建制派，除咗Holden，自由黨亦有意派出該黨東區區議員李鎮強「空降」接棒出戰新界東，雖然該黨田北俊至今去向未明，但肯定咬住新界東個位唔放。早已不滿成日為建制派「抬轎」嘅新界鄉議局，據知上水鄉事委員會主席侯志強亦蠢蠢欲動，想幫鄉紳爭多一席。一二年參選飲恨而回嘅西貢區議員方國珊，亦表明早已準備好。兩派內亂鎅票下會鎅走邊個，相信好戲連場。