港產官僚有兩大「本土」特色，一曰：「吹水唔抹嘴」，二曰：「亂噏當秘笈」。
近年最佳例子，莫如「官到無求膽自大」嘅政務司司長林鄭，佢斗膽話「天堂已留咗位」畀佢，「未知生，已知死」，林鄭果然叻過孔聖！又如「好學不倦」嘅教育局局長唔得掂，佢連上飛機都可以讀到十幾本書，如此愛書夜眠遲嘅局長，理應幫手推動香港嘅讀書風氣，可惜佢只知道唔可以廢除ＴＳＡ！
最近有「本土特色」嘅港產官僚，除了運房局副局長邱誠武外，另一個應推環境局局長黃錦星，審計署不久前公布嘅報告，批評佢「三個招牌菜」都唔掂，認真瘀爆！
講真，黃錦星最叻話自己每個月只要交百多元電費！之不過，佢搞嘅膠袋徵費成效認真麻麻，擾民多於一切，老朽每次去購書或去買手信如杏仁餅，次次都要畀多一蚊五毫，條氣點都唔順啦！
至於星哥鼓吹嘅廚餘回收，更加係失敗！鬼咩！乜嘢《惜食約章》得個「吹」字，政府部門好多都冇參與，佢老哥又冇積極跟進，結果被審計署踢爆數字摻水，廚餘回收統計數字有「假大空」之嫌！其實呢個都唔係乜嘢值得大驚小怪，港產官僚嘅做事方式，一味扮鴕鳥，一味自欺欺人，要講真係成匹布咁長都講唔完！
黃錦星最後一道「招牌菜」，就係一味靠嚇！佢話香港三個堆填區在二○一四至一八年會陸續爆滿，到時垃圾圍城，你同我除非練就「水上飛」，否則寸步難行。而實際情形係到二○一八年後，仍能維持一段時間！咁小學雞搞環保都高薪厚酬，香港會有藍天、白雲、綠草？搞環保信星哥？閣下毋須如政務司司長林鄭般忍辱負重，咁天真可愛如天使，天堂必有你一席焉！