立法會尋日辯論由議員陳克勤提出嘅「發展經濟，改善民生」議案，在分組點票下被否決都係意料中事，但估唔到連建制派議員都發言狠批克勤。工聯會王國興（阿王）批評，克勤為通過動議迴避反對派要推倒政府呢個焦點；工業界林大輝亦斥克勤想法天真，話政治和經濟民生息息相關。
阿王話，克勤無揭露真正矛盾所在，認為真正矛盾係立法會反對派要推倒政府，批評克勤為咗令議案通過，迴避咗呢個焦點，點名批評「陳議員，你點可以唔提呢個問題呢？」鬧完之後就轉身離開會議廳。大輝就直斥陳克勤自欺欺人，又話佢天真、理想化、不切實際，根本就係同現實脫節，仲話一個地方有人就會有政治。
議案最後因為未能得到直選議員支持而被否決，關鍵係十二票贊成對十三票反對，如果阿王無離席，議案好大機會通過。今次教訓克勤，下次提議案前要同建制議員多啲溝通，否則臨門一腳先至甩轆就唔抵喇。