中環出更：愛車交流 錦想懷舊
城中唔少名人都係愛車之人，日前有汽車品牌舉辦新車發布晚宴，吸引一班愛車名人到場，並分享對名車心得。現場除了寶馬香港及澳門董事總經理曾耀民外，當然唔少得香港汽車會會長余錦基。講起明年十月香港舉辦的電動方程式（Formula E），余錦基就憶起第一次賽車的經歷，話當年父親好反對佢賽車，所以佢就偷偷地去比賽。
同場嘅律師會前會長王桂壎都係愛車之人，而且非常長情，透露自己讀大學時購買第一部車，其後即使換新車，但依然唔捨得放棄舊嗰部，一直去到佢買第三部車時先至忍痛同第一部車講再見。
劉燊霆情繫Mini
生產力促進局主席劉展灝及兒子劉燊霆就鍾情Mini，二人第一部買嘅車都係呢個品牌。劉燊霆就話自己受父親感染，對Mini有獨特情意結，覺得好有型。不過，愛車嘅曾耀民就話，因為自己一直從事汽車銷售工作，反而咁多年都未買過車。
卓妮仲見到儲開古董車嘅生產力促進局前主席兼香港老爺車會榮譽顧問陳鎮仁（Clement），講起最想擁有嘅古董車，佢就話曾經喺電影《鐵金剛勇破火箭嶺》中出過場嘅豐田2000GT係佢願望清單上其中一部，現時擁有該型號車款嘅多數係日本人，但因為數量太少，市面難尋，真係有錢都買唔到。
現時Clement有唔少古董車收藏，其中一部係Daimler老爺車，佢話曾經提議過政府設立老爺車博物館，透過展出唔同懷舊汽車包括巴士、小巴、私家車等，生動講述香港歷史，佢仲可以將呢部老爺車借出來放在博物館展覽添，可惜一直未成事。
卓妮