中環出更：兒子不認同搞政治 狄志遠心痛
民主黨前副主席狄志遠（Dick）早前決定退黨成立新政黨「新思維」，話要走建制、泛民以外嘅第三條路，不過阿Dick自爆，原來其兒子私下同太太講，唔鍾意父親「搞政治」，對此感到心痛，之不過佢希望子女諒解同信任其決定，甚至乎可以畀個like佢喎。
八十年代開始從政嘅阿Dick，於電台節目回顧從政歷程，佢坦承自己唔鍾意政界，當年曾有記者話佢發言太溫和，搶唔到位，搞到自己面紅，甚至質疑自己係咪唔適合做政治人。
曾為家庭急流勇退
佢又透露自己於政界有進有退，其中於九五年一度以冇足夠政治智慧為由急流勇退，原因之一係同家庭有關，事關佢有次帶同太太同女兒出席家庭講座，於台上呼籲家長畀多啲時間陪子女之際，佢太太同女兒聽完之後就離開，當時阿Dick見兩人孤苦伶仃，似乎老公同父親都冇得揀，所以就決定退下來。
阿Dick講開父母同子女關係，當問及特首女兒梁齊昕於萬聖節掌摑母親一事，阿Dick強調「政治還政治、家庭還家庭」，希望各方唔好落井下石。
卓妮