中環出更：高錕畫展 繪出抗退化路
人口老化問題愈來愈嚴重，腦退化症成為大家關注的問題。患上腦退化症已經有十四年的光纖之父高錕尋日八十二歲生日，出席首次個人巡迴畫展第二站暨高錕慈善基金成立五周年活動，見佢喺太太高黃美芸陪同下精神抖擻，不時露出笑容，而高錕嘅畫作構圖已經進步不少，認知能力大大提升。
講到高錕近期的健康狀況，高黃美芸話，自從高錕跟導師鄺妙儀學繪畫之後心情變得開心，精神好咗。不過，高錕有時唔認得朋友，每次出街前都要太太反覆同佢講多幾次，好似當日畫展開幕，高太一起身就同佢講咗幾次會同佢出街，因為當日係佢生日，會同佢開一個大派對，好多朋友來同佢影相，叫佢唔使驚，夜晚就會食蛋糕慶祝。
李美嫦靠填色紓緩情緒
高錕的繪畫導師鄺妙儀就話，藝術治療可以幫腦退化症病人掌握距離及空間感，訓練佢哋聆聽指示的能力及反應，從而建立患者自信心。不過，教腦退化症病人繪畫亦有困難，例如病患者可能會以為顏色碟上五顏六色嘅顏料係食物，將顏料放入口，所以一定要睇住佢哋，但唔會因此將顏料轉做可食用色素，反而要藉此機會訓練病患者的認知能力。
同場仲有康文署署長李美嫦及副署長吳志華。講起藝術治療，李美嫦話自己都有開始培養緊藝術興趣，早前仲湊熱鬧喺書店買咗風靡全球的填色書《秘密花園》返屋企玩填顏色，話覺得放假填顏色有效紓緩平日緊張情緒。身旁嘅吳志華就鍾意喺假日享受下廚樂，動動腦創作新菜式，佢呢個星期就諗住試吓煮白酒炆豬腩肉，做晒一家之「煮」，太太乖乖等食就得喇。
卓妮