中環出更：廠商會集郵 賞楓歎神戶牛
秋高氣爽，又係欣賞紅葉嘅旺季。中華廠商聯合會（廠商會）一班會董會成員及秘書處高層早前舉行海上集思之旅，一行七十幾人浩浩蕩蕩坐郵輪遊日韓。沿途除咗睇楓景、食靚嘢之外，仲就廠商會嘅未來發展集思廣益，認真有諗頭。
有份參加今次活動嘅包括廠商會會長李秀恒（Eddy）、副會長徐炳光、楊志雄（Johnny）及史立德，仲有仁濟醫院副主席嚴徐玉珊及丈夫嚴玉麟、保良局前主席鄭錦鐘夫婦等人。佢哋一行人先由香港飛赴日本大阪，然後於神戶登上郵輪，沿途經過日本高知、南韓釜山、日本秋田及清水富士山等地，玩足十日。
船上搞攝影古董講座
Johnny話，嚟到神戶，梗係要試吓正宗神戶牛肉，佢最難忘係歎成吋咁厚嘅A5神戶牛柳。會董吳國安對秋田嘅遍地紅葉好着迷，佢話大家到咗韓國時，Eddy仲請全體團員勁擦阿拉斯加長腳蟹，個個食得好盡興。嚴玉麟就話，可以同一班好友共度悠長假期，已經好開心。
坐郵輪夠晒滋悠，不過時間流流長，所以佢哋亦安排唔少船上活動，包括由攝影發燒友Eddy擔任講者嘅攝影講座，仲請咗古董專家翟健民、謝啟亮同埋收藏家方毓仁等人分享鑑賞古董投資心得。發起今次活動嘅Eddy話，今次係廠商會有史以來最大型嘅集思會，仲要喺郵輪上舉行，眾人經過多日嘅輕鬆相處，加深彼此了解，亦為未來會務發展出謀獻策，收穫好大喎。
卓妮