無可奈何花落去，似曾相識客不來。內地一連七日嘅十一長假今日展開，以前到咗呢個時候，香港例牌客似雲來，遊人如鯽，可惜今時唔同往日，面對一片寒風，旅遊業慘淡經營，只能望天打卦咋。
內地官媒係咁講嘅，香港已成為最受內地旅客冷落嘅地區，今年十一長假期赴港人數比去年同期下降約四成，反而南韓、日本、台灣、泰國和美國成為內地民眾出境遊最熱門嘅地方。以前令內地人趨之若鶩嘅香港，依家連首五位都不入，講起真係羞家。
唔係誇張o架，本報記者去深圳了解內地旅客報團情況，旅行社大吐苦水，指報名旅客由去年每日三百幾人，減至今年每日得百幾人，都咪話唔慘淡。有內地人直言香港人將內地旅客購物問題政治化，令人反感，故無意到香港旅遊；亦有人話香港只有購物優勢，而旅遊吸引力就遠低於其他地方，唔會考慮往香港。
咁又係吖，激進組織不斷趕客，一時「鳩嗚」，一時「光復」，搞到七國咁亂，係人都怕怕喇。旅客唔肯上門，激進組織固然求仁得仁，但旅遊等相關行業就慘咯，目前已有四成導遊開工不足或被迫轉行，遲啲可能仲多人食穀種吖。以前每逢內地長假期，香港唔少商場都會積極吸客，而今年就冷冷清清，連宣傳都慳番。
聽吓酒店業人士點講喇，十一長假只有頭兩、三日嘅訂房率較理想，之後幾日就下滑，焗住要推出優惠吸客；據講唔少行家打算放盤，明年五一後可能有兩成小型賓館結業。飲食業亦唔好得去邊，有啲集團推出「黃金套餐」吸客，以前三千八百蚊一個套餐，今年被迫減價約三成。
旅遊業步入寒冬，港府有咩計呢？繼早前斥資八千萬元畀旅發局宣傳推廣後，日前又宣布撥款一千萬元設立旅遊配對基金，話要協助大型景點加強對海外宣傳喎。唔係功夫茶潑冷水，旅發局使咗大拿拿八千萬元推介旅遊，結果旅客不增反減，家陣配對基金只有區區一千萬元，誇張啲講句，買糖唔夠甜，買鹽又唔夠鹹，究竟可以做啲乜呢？
係人都知，訪港旅客人數之所以下跌，皆因激進組織無事生非，當局唔敢執法，淨係識得花錢推介，講得好聽啲係本末倒置，講得難聽啲根本就係九唔搭八。旅遊業團體調查發現，近六成半市民對反內地客行動表示反感，五成半人認為此類行動係趕客行為，等於向各地旅客傳遞香港唔歡迎旅客嘅負面訊息，再咁落去，六十萬名從業員生計堪憂。嗱，聽到未吖，如果當局繼續坐視趕客行為，無論使幾多錢宣傳推廣，都係嘥氣嘅咋！