探射燈：百業排隊執笠 足浴店死三成
個人遊來港人數大減，本港經濟顯著放緩，近月多個跨國品牌棄租一線商舖，不少老店亦相繼結業，預期結業潮會排隊而至。而足浴業更是首當其衝，單單今年，有足浴店已轉手五次，有個別地區出現十間足浴店先後結業情況。有業內人士指，市民消費意欲下降，屬非必需品的足浴按摩大受影響，即使現時是足浴旺季，竟試過八小時只做三個客人，預料冬季將出現結業潮，估計超過三分一足浴店將會倒閉。
「貴租又冇生意，我想唔做，依家都係捱到有人頂為止。」在觀塘經營足浴店五年的盧小姐坦言，自七月港股爆發小股災後，生意瞬即變差，業主更在七月加租千多元至一萬三千多元，屬於旺季的七月、八月亦接連每月虧蝕數千元，較去年同期的生意相距甚遠。「師傅都係請一個，連埋自己做，如果突然多生意，就會打電話叫兼職嚟幫手。」
睇淡前景 年內轉手五次
記者走訪觀塘、九龍城、土瓜灣、深水埗及荃灣多區，每區平均有三十至一百間的足浴店，包括大型足浴連鎖店及小型樓上舖。據知，上述多區的均有足浴店正在招頂，頂手費由五萬元至七萬元不等。有業內人士透露，有足浴店一年內轉手五次，同一條街內有五間足浴店同時招頂，反映業界對經營前景不感樂觀。
舖租暴升 經營苟延殘喘
事實上，經營慘淡的足浴店不止盧小姐一家，在深水埗區經營二樓足浴店的陳先生亦大嘆生意難做。「間唔中都食白果，今朝八點開舖到依家（下晝四點）都係做咗三個客。」陳指，現時因足浴店太多，客人又多貪新鮮，難靠熟客維持生意，「每個月都賺唔到幾千蚊，做咗幾年，呢段時間應該旺季都冇客，冬天就肯定拍烏蠅，應該好多舖都做唔住。」
足浴店其中一個經營困難與近年暴升的舖租有關，陳指出，以其五、六百平方呎的二樓足浴店為例，租金便要一萬七千多元，以往業主動輒加租三、四千元，幸好幾個月前與業主協商減租一千元，以一萬六千五百元續新租約，才能喘一口氣繼續營運，「個個月都收支唔平衡，捱住盤生意都係維繫住班師傅，唔好等咁多人失業。」
料中型店或新開業重災
連鎖足浴店知足康營運總監朱守軍表示，舖頭經歷沙士、科網股爆破、金融海嘯及現時幾波的經濟低潮，今年市道變差，雖令生意較去年同期下跌一至兩成，仍屬可接受的水平。他認為，足浴店利潤低，需靠薄利多銷，其中有知名度的大商舖及經營成本低的一人商舖，會有較佳經營優勢。他預料，中型或新開業的足浴店有機會最受影響，預料在今年年底淡季有超過三分一的足浴店結業。
恒生管理學院商學院院長蘇偉文分析指，所有衍生服務受季節性影響，非必需品的行業最受經濟環境影響，經濟環境好，市民願意花費；一旦經濟環境變差，市民普遍不願意在非必需項目花費，令需求減少，不但足浴業受影響，連帶其他消閒行業亦有機會收縮，有關行業亦有機會受過境旅客減少而生意受影響。他指，無論任何行業包括足浴店在經濟環境轉差時，或需減聘人手或將全職轉兼職，減低成本；或出售套票，增加現金流，拖長時間捱到經濟環境好轉。
圖／文：專案組