廣深港高鐵香港段超支兼延誤嘅責任誰屬問題，仍然莫衷一是，然而追源溯始上屆政府係「元兇」之一。立法會交通事務委員會主席田北辰（田二少）批評，上屆政府喺擬定涉及高鐵合約時已有問題。據佢了解，政府做咗約七成勘探就招標，未有顧及尚未勘探嘅三成地方或有風險，埋下超支嘅伏線。
對於近日被質疑於高鐵問題企喺港鐵立場發聲，經常就高鐵問題拆彈獻計嘅田二少強調，自己無幫任何一方，而係代表市民向政府及港鐵「各打三十大板」，其中政府要考慮環境改變等因素，為高鐵造價「封頂」，港鐵亦應盡快召開大會，要求小股東支持較高嘅「封頂費」，佢同時向承建商表明，唔好當納稅人係提款機。
田二少續指，據港鐵早前指高鐵工程用咗四百六十幾億，佢估計仲有約六十億元工程未做，但現金流只剩下三十幾億，如果唔夠錢，加上政府同港鐵嘅爭拗未解決，以及「一地兩檢」問題，承建商將唔肯墊支，到時港鐵有權要求承建商停工，一旦停工至約三個月，承建商或會提出索償。佢擔心若承建商離場，會導致高鐵進一步延誤同超支。