政情：議員翻閹舊橋 劣制不變

立法會昨日召開政制事務委員會特別會議，檢討現行選民登記制度。政制及內地事務局局長譚志源提出多個建議，希望完善現行選民登記制度。包括提前更改資料限期、更改及登記時提供住址證明文件、進行公眾教育、提高反對機制門檻及相關罰則，以及成立住址資料庫防止輸入時出錯等，希望趕得切於明年立法會選舉期前完成。

李卓人拒撐住址證明

除咗政府畀意見，唔少議員都有份出橋，點知提出多數屬舊橋，無乜建設性。公民黨毛孟靜就話，現行登記制度得個亂字，政府係咪會要求選民更改地址或新登記時提供住址證明文件。譚志源一聽到呢個舊橋，即刻發晦氣，話以前都提出過同樣意見，不過得唔到議會同社會支持。

工黨李卓人隨即「現形」大聲反對，事關年滿十八歲嘅青少年多數係中學生或大學生，佢哋無銀行戶口，好難搵到地址證明。佢批評政府將核實責任推到投訴人身上，屈舉報人士濫用投訴機制，係助長種票、阻人舉報。

麥美娟鬧錯人遭駁斥

工聯會麥美娟亦批當局把關不力，無發現不尋常狀況，表格錯漏照樣受理，擔心有意參選者被冒簽改地址令到無法參選。選舉事務處總選舉事務主任李柏康就反駁指，更改地址與參選資格並無衝突，因區議會條例並無限定要該區選民先可參選，麥議員做錯功課鬧錯人！

立法會議員謝偉俊就建議加重罰則，因為市民更改住址需即時通知人事登記處及提供新住址，否則屬刑事罪行，政府應嚴格執法堵塞選民登記漏洞。其實該款建議一樣「炒冷飯」，幾年前都已經提出過，講完又講認真浪費光陰。