中環出更：憶述奮鬥史 葉茂林感觸灑淚
香港城市大學及香港浸會大學尋日分別舉行榮譽院士頒授典禮與支票捐贈儀式。芥籽園基金主席陳家駒及曾任職多個政府部門嘅前「AO一姐」黎高穎怡（Rebecca）獲頒城大榮譽院士；浸大則獲耀才證券主席葉茂林捐助八百萬港元，葉茂林致詞時更一度因感懷身世而淚灑當場，場面感人。
講起個人奮鬥史，葉回憶自幼家境清貧，一家六口瞓同一張碌架床，佢要穿膠花幫補生計被迫中途輟學，令搵工更難，無計可施下做小販維生。作為家中長子嘅佢負起家庭經濟重擔，生意一冇着落就要全家捱餓，佢好自責，經常會匿喺廁所撼頭埋牆，或收埋自己喺被窩中哭泣。好彩最終佢搵到自己一片天，熱爆嘅台灣名曲《愛拚才會贏》當中「三分天注定，七分靠打拚」嘅歌詞，更令佢畢生難忘。佢話，根本冇天注定，全靠自己打拚，所以學生若想成功一定要努力，僥倖富貴唔會長久。
黎高穎怡獲頒榮譽院士
另一邊廂，城大頒授榮譽院士現場都好熱鬧，財經事務及庫務局前常任秘書長區璟智及創新科技署前署長王榮珍都去捧Rebecca場。Rebecca與王榮珍係中學同學兼世交，區璟智就係Rebecca當年結婚時嘅伴娘，三位姊妹淘聚首特別興奮。
區璟智自爆，當年做伴娘係佢呢世人着得最隆重嘅一次，連自己結婚都只係着西服喎！講講吓，三人話仲未試過一齊旅行，既然大家都退咗休，遲啲一齊旅行都唔定喎！
卓妮