元州邨蝨陷 房署拒援手
元州邨爆蝨患，房屋署闊佬懶理！深水埗元州邨多個單位受木蝨大軍入侵，有居民被咬至全身多處紅腫，房署接獲反映後只覆「個別衞生問題」，一直「袖手旁觀」。有滅蟲專家直指，炎熱天氣為木蝨繁殖季節，如處理不當可致社區性蔓延。區議員證實，邨內蝨患已持續兩年，高峰期每日接獲四、五名居民求助，促房署正視問題，並酌情協助困難戶處理木蝨。記者：呂諾君
咬到成身紅腫 痕癢難眠
「夜晚瞓都瞓得唔舒服，有時痕得滯起身睇，見住一隻隻木蝨喺牆度捐出嚟，床邊近枕頭位就最多！我平時明明好乾淨，都唔知啲蝨喺邊度嚟！」居於元州邨元盛樓的莊先生指出，數月前家中開始出現木蝨，令其大感困擾，「試咗好多方法，噴過殺蟲水但都冇用，瞓唔到覺之餘，仲咬到我成身又紅又腫！」莊曾四出尋求滅蝨良方，幸近日終獲社福機構協助滅蝨，但不滿早前向房署求助，卻遭諸多推搪，拒絕協助。
居於元雅樓的楊先生家中亦出現大量木蝨，「每晚三、四點都有，最多有成八十幾隻爬出嚟，我聽到好多戶人都話有蝨，同房署講過，佢哋就話係私人事要我哋自己搞，係咪要全邨人都有（蝨患）佢哋先肯做嘢？」
元州邨物業服務辦事處發言人承認，過去一年共接獲五宗木蝨報告。發言人又指，該處在收到求助的個案後，會派員上門了解及向住戶解釋滅蝨方法，惟認為單位木蝨問題與住戶個人衞生習慣有關，因此一般不會為住戶清理。發言人強調，該處除在有木蝨問題住戶的樓層公眾地方加強清潔外，亦會定期在公眾地方進行滅蝨工作。而就以上的個案，該處已前往探訪，住戶表示會自行處理。
香港殺蟲業協會公關主任蔡炳然指出，時有聽聞屋邨出現蝨患，而天氣炎熱為木蝨繁殖季節，倘處理不當，蝨患可迅速蔓延，並造成社區性擴散，「滅蝨應該要先清理雜物，同埋填好啲『窿窿罅罅』，唔畀木蝨喺入面產卵。有時啲人一見張床有蝨就丟出垃圾站，如果畀人執咗番屋企，又會造成交叉傳染。」蔡認為，應由房署牽頭帶領滅蝨，以完全根治屋邨蝨患。
近兩月已接40宗求助
當區區議員陳偉明證實，早於兩年前已接獲居民反映邨內出現木蝨，近月情況尤為嚴重，「最高峰每日有四、五個街坊嚟求助，近兩個月都已經有成三、四十宗！」陳要求房署加強清潔公眾地方，而對於獨居長者及困難戶應酌情協助滅蝨，「其實有好多住戶都冇辦法自行處理木蝨，木蝨問題已經有成兩年，房署好應該幫手，解決居民問題！」