自古以嚟楚楚動人嘅女性，零舍容易打動男人，但隨住兩性觀念改變，外柔內剛嘅囡囡更討男人歡心，好似內地新進嫩模楚楚咁，就係最佳例子。事關佢柔弱嘅外表下，埋藏堅毅同剛強嘅性格，配合玲瓏浮凸嘅火辣身材，甫出道即成為男士們心目中嘅女神。
男士一聽到浙江杭州，總會聯想到呢個地方出名盛產美女，而見到新進模特兒楚楚時，更係印證咗呢種想法一啲都冇錯。現年18歲嘅楚楚，於今年初出道，憑住出眾嘅身材及模特兒界少見嘅柔弱氣質，配合埋楚楚可憐嘅眼神，令佢備受注目。當然，佢敢於以超性感造型示人嘅大膽作風，亦令佢極速冒起，出道冇耐，便成功舉辦多次「外拍」，即係以旅行方式到外國進行攝影活動，當中包括海南島、吉隆坡等，足見佢人氣有幾咁高。可能有人覺得阿妹年紀輕輕就出道，太過急於搵錢，應該繼續進修裝備自己。唔講唔知，原來呢位模界新貴正於浙江傳媒學院就讀，並非只係一個單純得外表嘅花瓶，而係內外兼備嘅美人兒。
作為一位90後嘅新進模特兒，楚楚不但擅於喺網絡上為自己造勢，仲一啲都唔介意將火辣靚相同粉絲分享。不過，講到佢最厲害嘅誘粉招數，莫過於識得喺適當嘅時候大發嬌嗔，好似早前拍攝寫真時，畀攝影師笑佢有肚腩仔，當晚佢就喺個人微博上話：「我都餓死了，你們還說我有肚子，哪來？不高興！」咁直率嘅撒嬌方式，搞到一眾粉絲既心郁又心痛，紛紛留言支持女神。跟住佢再留下一句話：「我是一顆傲嬌的瘦子。再見。呵呵」嘩！喺一放一收間就已經打動眾多粉絲嘅心，縱然阿妹未必掌握到男人嘅心理，卻已經令其人氣大升。從呢件事睇得出，楚楚極速冒起確實有獨到之處，而佢為咗拍攝寫真甘於捱餓，更證明佢性格幾咁堅強。
網址： www.weibo.com/xiaoxiaoxiaomilk
簡介： 楚楚嘅外形雖然人如其名，但實際性格卻係相當活潑，至於使錢方面，佢絕對唔係大花筒，只會喺應使則使嘅情況下，才會大破慳囊。點解會咁了解佢嘅性格？咪就係因為佢經常喺個人微博上分享生活點滴囉！
出生地：浙江杭州
身高：172cm
三圍：33、24、33
撰文：魂