政情：佔領失意 學民女放閃「療傷」
佔領行動啱啱一周年，學民思潮發言人黃子悅突然喺社交網發表咗篇長文，公布與學民前發言人劉貳龍嘅戀情。黃子悅自稱不擅辭令，但係「上天偏偏讓我遇着你」，「只要和你在一起，我就很放心很輕鬆，一時間肩上的重擔都消失了」。唔通佢係想為佔領一周年活動人數少轉移視線？
黃子悅又話，兩人都曾在金鐘旺角度過七十九日，都曾獨自一人走過那疲憊無力的時光，其後戀情種子萌芽。文章從未提過劉貳龍名字，但係擺上兩人嘅合照放閃，戀情不言而喻。
唔少學界中人紛紛留言祝賀，學聯秘書長羅冠聰以警方佔領時發放嘅催淚彈調侃，稱公布戀情係八十七粒閃光彈。學民思潮召集人黃之鋒則稱：「雨傘運動一年以後公佈（布），是要治療運動創傷嗎？」佢仲疑似爆出另一前發言人周庭戀情，當黃之鋒問周庭「幾時到你」，更貼上中大學生會常務幹事黃健朗嘅名字。周庭與黃健朗則疑似打情罵俏，未知遲啲會否又有一對學界情侶呢？