政情：田二少抽水遭算帳
港鐵今年中公布，廣深港高鐵開支由六百五十億元升至八百五十三億元，超支逾二百億元，落成日期更延至一八年第三季，到時都仲未知可唔可以落成，搞到政府唔知點收科。九鐵前主席、立法會交通事務委員會主席田北辰（田二少）食正條水，早前不停爆料抽水，話當年政府壓價狂斬預算先至埋下今日超支禍害，又話不如政府補鑊畀夠數，其餘超支先至由港鐵承擔云云，扮到好似知情人士咁。
不過有政府消息人士踢爆話，二少根本係企喺港鐵立場講嘢，而且內容不盡不實。田二少曾經爆料話，本來港鐵方面預料高鐵工程要花八百億元，但政府當年壓低工程費，所以先搞到唔夠錢用。如果政府真係壓低工程費，點解工程公司又願意投標？正所謂「牛唔飲水唔撳得牛頭低」。
一○年通過預留六百億
消息人士續稱，立法會一○年通過高鐵撥款，預留六百億元畀高鐵工程合約。至今高鐵項目嘅鐵路隧道、西九龍總站及機電工程三大範疇，只係批出四百五十多億元合約，證明政府當時預測都幾準確，依家仲有現金流。
田二少又建議，不以一八年第三季通車為目標，咁就可以降低開支，因為唔使搶貴工程費喎！政府中人就質疑，工作就係咁多，唔會因為延期通車而少咗，只係唔使搶高工人工資，但延長工程嘅話，到時管理費一樣會多咗，一加一減都未必有着數。
政府中人直言，由於港鐵係獲政府委託處理高鐵，條款冇可能列出港鐵要負無限責任，所以跟合約，只係唔收管理費，點處理都好頭痕。不過政府中人相信最多只需經仲裁解決，唔需要打官司。加上今個立法年度於明年七月就會完結，中間夾住區議會及立法會選舉，喺咁嘅政治環境下，都唔知點樣同幾時向立法會申請追加撥款。
索償多 田質疑勘探欠妥
我哋問過田二少，佢就反駁話，政府只預四百五十億元加五十億元應急費畀港鐵工程，依家即將使晒。佢又質疑政府冇勘探好地底數據，又改天幕設計，先搞到好多索償。佢強調自己係代表市民發聲，希望港鐵同政府放下意氣之爭，傾好點處理超支一事。