公民黨（公文袋）六名立法會議員唔夠團結已係公開嘅秘密，大家同屬一個政黨卻有多個立場，十分混亂。該黨創黨成員湯家驊宣布退黨兼辭去立法會議員職務後，觸發公文袋進一步內訌。事關依家公文袋六人辦事處位於立法會八樓，湯嘅辦事處夾喺毛孟靜同黨魁梁家傑（袋巾傑）中間，湯出走令公文袋中人未能連成一線。除非毛孟靜搬位移近袋巾傑，否則立法會秘書處或會以圍板封住空出嘅辦事處。
據知公文袋中人對解決此問題意見不一，有人主張毛孟靜應搬位填補番呢個「空缺」，以免溝通出現問題。亦有人認為搬出搬入好麻煩，想不變應萬變。不過仲有人話，既然大家平時意見都南轅北轍，不如趁機邊緣化毛孟靜喎！
此外，袋巾傑早前於泛民集思會曾拍枱一事餘波未了，有人爆料話，袋巾傑拍枱早已有前科，有次同特首梁振英共進早餐時，袋巾傑就某議題爭拗拍枱，令早餐會草草收場；另一次係同基本法委員會委員饒戈平會面時，袋巾傑因有評論批評泛民「賤骨頭」大興問罪之師而拍枱。所以袋巾傑拍枱非偶發事件，可能有鋪癮都唔奇。
卓妮