中環出更：慶節活動多 最緊要團圓
早幾日中秋節適逢連續假期，唔少城中名人過節特別緊湊精彩。潮屬社團總會主席陳幼南中秋夜同家人於大坑觀賞舞火龍，感受節日氣氛，翌日「追月」再與太太張思敏及兒子陳誠傑入馬場湊熱鬧。理文造紙創辦人李運強則與家人齊齊上天台賞月，睇住啲孫仔開心玩燈籠，一家團圓最幸福不過。
陳幼南話，佢同家人睇大坑舞火龍起步已有幾年，知道一定又熱又多人，所以一早就帶定條毛巾準備抹汗。好在佢哋住喺附近，唔使刻意於大坑食肆訂枱食晚餐，一家人喺屋企食完飯先慢慢行落去就有得睇喇！
子孫滿堂嘅李運強就話，中秋節叫埋啲孫及親家聚首一堂，連農曆新年都未必咁齊人。過中秋免不了食月餅，依家啲月餅口味五花八門，李運強話最鍾意嘅都係傳統白蓮蓉月餅，仲話至今仍未試過冰皮月餅喎！
貝鈞奇睇波多過賞月
香港足總副主席貝鈞奇就對圓碌碌嘅足球比較有興趣，中秋夜同家人一齊睇波多過睇月亮。講起國際足協正調查緊早前香港球迷於世界盃外圍賽主場對卡塔爾時，賽前被指噓國歌一事，貝鈞奇就話未有咁快知道調查結果，估計需時約兩個月左右，到時佢會視乎懲罰而提出上訴。
至於福建幫頭領楊孫西、施子清及盧文端三位結拜兄弟，一向都一齊過節，今個中秋亦唔例外，三家人共約四十人一齊喺深灣一個會所訂枱食飯，場面好熱鬧。
卓妮